Romans 11
Hu'mau Isilaeli bona'magi kumu fulu huto minose'namofihi hapa'a
1Ya'mu nani koloka nohobe: Hu'mau ai'a Yuta naga'i he'mi epolo'ehifiye? O'e, ya'ma mehu'ehibe. Nani Yuta bo nohunagi. Abalaha yagapana'a nohube. Nani biha'nimofihi gi'a Beyamini yabe. 2Hu'mau koyapa'i fuku luto enele'mo'ehina bona'a he'mi meepolo'ehina. Hu'mamofihi kaga lu yege hose bouba, Elaiyau Isilaeli bona kumu lu'ehina ka mono bukugu ni'igo beto hilane. Ai ka foyagu enele'mo moloto ma luto Hu'mamofihi loka ho'ehina: 3Sipi Bo'nio. Enali kaga lu yege hose bonakamagihi enehe filite, to efaha hitakalo i tele tulu bi'ahana. Ya hi'ahago nanisigo nominogo enali nehalune'mu nehanagihe. Elaiyau ya luto lu'ehina yabe. 4Ya ligo Hu'mau ka'alo nona'a ma luto lu emi'ehina:Kaisigo menohane. Bona'i luga'amagi 7 tauseni nanitoga agoya hu nimite neminabe. To enali kene'i mone lugefa gi'a Baali meha'aloga gigusa'agu enalahupa mefise bona'i neminana yabe. 5To yatai kanagu ana huto ni'ibe. Hu'mau bona'i mone'amagi ai ginaga figo li gehe lito enele'mo'ehina bona'magi neminabe. 6Enali hetofa suhi lite mine'ahana bona'i nehago enele'mo'ehifiye? O'e, ai'a ginaga fi epolo'ehinalo enele'mo'ehibe. To hena'mube? Ai enali hetofa suhi lite mine'ahanalo enele'matita enali Hu'mau lusiga luto ginaga fi lepolo'ehifi ya mehu'ehifi lite mekehelitine.7To ya huto ni'igo Isilaeli bona'magi ma hite neminabe. Enali Hu'mau enele'malina hapa'a sa sa hi'ahana aku'i enali asaga'i meli'ahabe. Mone kegi'a nesi'a bona'magihi Hu'mau bita hu'ehina'amagi enaligo ali'ahana yabe. To ya'ma meli'ahana bona'magi komopa'ani hekini lago Hu'mamofihi nogo'a kehe igo mekeheli'ahabe. 8Ananamo'mu mono bukugu fayahi ge'ahana:Hu'mau komopa'ani hiti kehelise'na'ani hiti le'mo keta hu'ehina. To enubu'ani hiti enegekesa'ani hiti hekini lo'ehigo enali yatai kana'agu mekehelise fa'mene neminabe.
9To koyapa bo, Tebitiu mone fayahi go'ehina ya'ma mono bukugu ni'ibe:
- Enali sipi nose'na melenogomo
- kofohi meleno.
- Enele'mo laba huto osahi epino.
Hu'mau fegutoga bona'magihi enele'mo bati hilibe
13Yatai nani Hu'mamofihi kaga'a lito bulata bo nohuto'ni lenali fegutoga bona'i ka lu nolepube. Nani Hu'mau lili'na nimi'ehina'mu nofokehi nolube. 14Ya'ma mono ka lili'na nolugo Yuta bona'nimagi kehelite siko hilete ana kagamu'i lagati lebesibe lite nelago Hu'mau mone'amagihi enele'menogo mino kosaba huse'i lilabe. 15To Hu'mau Yuta bona'magihi enele'mo he'mi'ehinalo asaga melugu bona'magi Hu'mamofihi lalu'agi lolo hi'ahana yabe. Ya hu'ehina'mu alihi kana'agu Hu'mau aku Yuta bonatoga i behe huto enele'menogo legelo bise'na babu luto huto hilibe. Ana kanagu Hu'mau fili'ahanamagihi mino kosaba huse'na epilinagi minoba minoba nehana suhi lite minalabe.16To mone beleti nose'na ni'igo mone'a enali li gofa hite Hu'mamofihi nose'na yabe lite ai'a molo emi'ohune lite li gehe li'ahana ni'igo aku ya'ma beleti nose'na asaga'i ai'a hiti ni'ibe. To ana suhi huto yafamo lufusa'a hiti bati huto ni'igo yaha'a ana huto bati huto ni'ilina'mu yabe. 17To Yuta bona'magi foyagu kofo'ehina oliba yafa supo hite neminabe. To fegutoga bona'magi lopi oliba yafa supo hite nehabe. To Hu'mau hetofa yafamofihi yaha'a mone'a laga hu he'miloto to lopi yafaloti yaha'a mone lito oto hetofa yafa laga hu'ehinalo li molo hepito nagatu sa gilago nogoya'a logoto ana lopi yafamofihi yaha'a le'mo bati nohilibe. Lenali fegutoga bona'magita ya'ma lopi yafamofihi yaha'a molo hepi'ehinana legi hite neminabe. Yana'mu Hu'mau yata'a Yuta bona'magihi mino hetofa huse'na epi'ehina yamofihi lenali fegutoga bona'magita yatai lite bati hite neminabe. 18Ya huto ni'igo to lenali ya hite neminago enali Yuta bona'i laga hu he'mi'ehina yaha'amo legita nehana'amagi kumu lenali sibi lenegekesa meyigilo. Henabe luto lenali lenugufa limo titi nehabe? Lenali fa'mene yafa yaha'a yana suhi nehabe. Yafa lufusa'auba lenali'i kaba huto amuya molo lepalalina'mu lenali ai'a kaba menehabe.
19Nani ya nolugi lenali ma luto lu nimilabe: Hu'mau lali'i ya'ma yafa yaha'a laga hu he'mi'ehinalo li hepito malago bati huto nominone. 20O, lusiga nelabe. Ya'ma Yuta bona'i enali Hu'mamofitoga keheli ule'ale mehi'ahago Hu'mau laga hu he'mi'ehigo lenali aitoga komopatini emite keheli amuya malago ai li hepito molo lepolo'ehina. Ya hu lepolo'ehigo lenali yanana'mu lenugufa limo titi hu lalibe luto legeso hite lenelesatini nolinogo minalo. 21Hu'mau enali ya'ma Yuta bona'i lusi yafa yaha'a suhi hite nehanamagihi ginaga mefise he'mi'ehinagi yamu'i lenali kumu ginaga fito henabe luto laga mehu lepalalibe? 22Hu'mamofihi hapa'a loemo ni'ina. Fulu huto lehe'mose hiti to ipagu logo bito osahi limise hiti ya ni'igo kehelilo. Ai sibina sabana huse bona'magihi ka epekito osahi epilata nohina. To lenalitini ai fulu huto li hetofa hu lepalalata nohibe. Lenali agoya hu emilata nehite fulunagu minete bati hite minalabe. Lenali aku kegeiyo hilenogo ka lepekito laga hu he'mi lepalalibe. 23Hu'mau sipi amuya bo nohinagi Yuta bona'magi komopa'ani li gelehe hite Hu'mamofitoga agoya hu emilenogo ai enali ana yafalo aku'i li hepito epalalina'mu yabe. 24Lenali fegutoga bona'magi lopi oliba yafamofihi yaha'a suhi lite nehabe. Hu'mau lenali ana yafaloti laga huto ai'a yafalo li hepi lepolo'ehinamo keta huse lili'na li'ehina yabe. To Yuta bona'magi hetofa oliba yafamofihi yaha'a legi hite nehana'mu Hu'mau mone yupahi enali aku'i yafa'alo enele'mo hepilina'a nohinogomo ya'ma sipi lili'na'a meni'ibe.
Hu'mau yege yege bona kumu fulu huto minose'na
25Nalalu'nigitabe. Mone suguna ka lu lenelepilugi kehelilo. Lenali kehelite lali kehelise'nati sipi bati nohune lite lenugufa limo titi hu laligi ma kaga lu nolepube. Yuta bona'magi Hu'mamofihi enemegesa hi emiba emiba hite komopa'anigu ule'ale hise'namofihi kana'a mone su halina'mu yabe. Fegutoga bona'magi Hu'mamofitoga komopa'ani emilana bai tenogomo Hu'mau Yuta bona'magihi aku'i enele'malina'mu yabe. 26Hu'mau asaga Isilaeli bona'magihi enele'menogo bati hilanamofihi kaga mono bukugu ma lite fayahi ge'ahana:- Enubuto bilina bouba Yiona hepa'mofihi
- kosaguti huto hilibe.
- Ai Yakopuhi yagapana'magihi foipana'ani
- asaga'i li he'mi epalalibe.
Hu'mamofihi gi'alo liyafa hilata nohune
33Akae. Hu'mamofihi kehelise'na'a hetofa hatofa ni'inagihe. Ai asaga'namofihi keheliya ito bai to'ehina yabe. Keheli bati huse'na'a sipi ni'inagi ekesa yigise'na'a kiyi'afu kehelilibe? To hapa'amu hiya bouba anana kehelilibe? 34Yana'mu mono bukugu fayahi keye'ahanamo mone ma ni'ibe:- Sipi Botihi komopa'agu
- ekesa kehelilata'na
- hiya bo moneuba kehelilibe?
- Hiya keheli bati huse bouba
- ana hubo, ana hubo luto
- ya'ma kaga lu emilibe?
Copyright information for
BEF